گوجرہ: 5 اگست یومِ استحصالِ کشمیر کے موقع پر میونسپل کمیٹی گوجرہ کے زیرِ اہتمام ایک خصوصی تقریب منعقد کی گئی، جس میں کشمیری عوام سے بھرپور اظہارِ یکجہتی کرتے ہوئے ان کی جدوجہدِ آزادی اور قربانیوں کو خراجِ تحسین پیش کیا گیا۔
تقریب میں اسسٹنٹ کمشنر گوجرہ ریاض گجر، چیف آفیسر میونسپل کمیٹی سید یاسر شاہ، صدر انجمن تاجران منصور احمد بھنگو، مختلف تعلیمی اداروں کے طلبہ، سرکاری افسران، سماجی شخصیات اور شہریوں کی بڑی تعداد نے شرکت کی۔
مقررین نے اپنے خطاب میں کہا کہ 5 اگست کا دن مقبوضہ جموں و کشمیر کی خصوصی آئینی حیثیت ختم کیے جانے کے بھارتی اقدام کی یاد دلاتا ہے۔ انہوں نے کہا کہ کشمیری عوام کئی دہائیوں سے اپنے بنیادی حقوق اور حقِ خودارادیت کے لیے جدوجہد کر رہے ہیں، اور پاکستان ہر سطح پر ان کی اخلاقی، سفارتی اور سیاسی حمایت جاری رکھے گا۔
شرکاء نے اس عزم کا اعادہ کیا کہ کشمیری عوام کے حقِ خودارادیت کی حمایت ہر فورم پر جاری رکھی جائے گی اور مسئلہ کشمیر کے منصفانہ اور پائیدار حل کے لیے عالمی برادری کو اپنا کردار ادا کرنا چاہیے۔
تقریب کے اختتام پر پاکستان کی سلامتی، ترقی و خوشحالی، قومی یکجہتی اور مقبوضہ جموں و کشمیر کے عوام کے لیے خصوصی دعا کی گئی، جبکہ کشمیر کے شہداء کو بھی خراجِ عقیدت پیش کیا گیا۔
