الحمدللہ، گوجرہ کے لیے ایک اور باعثِ فخر خبر سامنے آئی ہے۔ گوجرہ سے تعلق رکھنے والے ممتاز قانون دان چوہدری غلام سرور نہنگ کو لاہور ہائیکورٹ کے ایڈیشنل جج کے طور پر تعینات کرنے کی منظوری دے دی گئی ہے۔ یہ فیصلہ جوڈیشل کمیشن آف پاکستان کے اجلاس میں کیا گیا، جس کے بعد ان کی تقرری کا آئینی عمل مکمل کیا جائے گا۔
چوہدری غلام سرور نہنگ کا شمار ملک کے ممتاز قانونی ماہرین میں ہوتا ہے۔ انہوں نے اپنی پیشہ ورانہ زندگی میں قانون و انصاف کے شعبے میں نمایاں خدمات انجام دیں، جس کے اعتراف میں انہیں لاہور ہائیکورٹ کے منصبِ جج کے لیے منتخب کیا گیا ہے۔
ان کی یہ کامیابی نہ صرف ان کے خاندان بلکہ پورے گوجرہ اور ضلع ٹوبہ ٹیک سنگھ کے لیے اعزاز کی بات ہے۔ مقامی سماجی، سیاسی اور قانونی حلقوں نے اس اہم پیش رفت پر خوشی کا اظہار کرتے ہوئے امید ظاہر کی ہے کہ چوہدری غلام سرور نہنگ اپنی صلاحیتوں، دیانت داری اور قانونی تجربے سے انصاف کی فراہمی میں اہم کردار ادا کریں گے۔
گوجرہ کے عوام نے اس کامیابی کو اپنے شہر کے لیے ایک تاریخی اعزاز قرار دیتے ہوئے چوہدری غلام سرور نہنگ کو دلی مبارکباد پیش کی ہے۔
