گوجرہ: جھنگ روڈ پر واقع ہاکی اسٹیڈیم کے سامنے نورانی قبرستان میں درختوں کی غیر قانونی کٹائی اور لکڑی چوری کا سلسلہ تاحال نہ رک سکا، جس پر مقامی شہریوں نے شدید تشویش کا اظہار کرتے ہوئے انتظامیہ سے فوری نوٹس لینے کا مطالبہ کیا ہے۔
شہریوں کے مطابق بعض عناصر پہلے قبرستان میں موجود بڑے بڑے درختوں کو کاٹ دیتے ہیں اور چند روز بعد موقع پاکر ان کی لکڑی اٹھا کر لے جاتے ہیں۔ ان کا کہنا ہے کہ قبرستان کی دیواروں پر واضح طور پر "درخت کاٹنا منع ہے" کے انتباہی بورڈ اور تحریری ہدایات موجود ہیں، مگر اس کے باوجود بااثر افراد قانون کی خلاف ورزی کرتے ہوئے درختوں کی کٹائی جاری رکھے ہوئے ہیں۔
علاقہ مکینوں کا کہنا ہے کہ اس غیر قانونی عمل کی وجہ سے قیمتی درخت تیزی سے ختم ہو رہے ہیں، جبکہ متعلقہ اداروں کی جانب سے مؤثر کارروائی نہ ہونے کے باعث ملوث افراد کے حوصلے بلند ہو رہے ہیں۔
شہریوں نے ریاض گجر اور محکمہ جنگلات کے متعلقہ حکام سے اپیل کی ہے کہ نورانی قبرستان میں درختوں کی غیر قانونی کٹائی اور لکڑی چوری میں ملوث عناصر کے خلاف فوری اور سخت کارروائی کی جائے، تاکہ اس عمل کو روکا جا سکے اور قبرستان کے درختوں کا تحفظ یقینی بنایا جا سکے۔
