فیصل آباد: اعلیٰ تعلیم کے خواہشمند طلبہ کے لیے خوشخبری ہے کہ زرعی یونیورسٹی فیصل آباد نے دوسرے انٹری ٹیسٹ کے لیے آن لائن رجسٹریشن کی آخری تاریخ میں توسیع کر دی ہے۔ یونیورسٹی انتظامیہ کے مطابق اب امیدوار 29 جولائی 2026 تک آن لائن رجسٹریشن کروا سکتے ہیں۔ یہ معلومات یونیورسٹی کے داخلہ پورٹل پر بھی دستیاب ہیں۔
اعلامیے کے مطابق دوسرے انٹری ٹیسٹ کا انعقاد 2 اگست 2026 کو کیا جائے گا، جس میں کامیاب امیدوار مختلف انڈرگریجویٹ پروگراموں میں داخلے کے لیے اہل ہوں گے۔
یونیورسٹی نے خصوصی طور پر آگاہ کیا ہے کہ وہ امیدوار جو ٹوبہ ٹیک سنگھ کو اپنا امتحانی مرکز منتخب کرنا چاہتے ہیں، انہیں 28 جولائی 2026 تک اپنی آن لائن رجسٹریشن مکمل کرنا ہوگی۔ اس کے بعد ٹوبہ ٹیک سنگھ سنٹر کے انتخاب کی سہولت دستیاب نہیں ہوگی۔
یونیورسٹی انتظامیہ نے تمام امیدواروں کو ہدایت کی ہے کہ وہ آخری تاریخ کا انتظار کیے بغیر بروقت اپنی رجسٹریشن مکمل کریں تاکہ کسی بھی قسم کی پریشانی سے بچا جا سکے۔ مزید معلومات اور آن لائن رجسٹریشن کے لیے امیدوار زرعی یونیورسٹی کے داخلہ پورٹل سے رجوع کر سکتے ہیں
