لاہور: ضلع ٹوبہ ٹیک سنگھ کی آل پرائیویٹ اسکولز اینڈ کالجز ایسوسی ایشن کے صدر محمد امین بسرا اور معروف سیاسی و سماجی شخصیت سلیم بسرا نے منسٹر ہاؤس لاہور میں صوبائی وزیرِ تعلیم پنجاب رانا سکندر حیات سے خصوصی ملاقات کی۔
ملاقات کے دوران نجی اسکولوں اور کالجوں کو درپیش مسائل، تعلیمی اداروں کے انتظامی امور اور اساتذہ کو پیش آنے والی مشکلات پر تفصیلی تبادلہ خیال کیا گیا۔ محمد امین بسرا نے ضلع ٹوبہ ٹیک سنگھ سمیت پنجاب بھر کے نجی تعلیمی اداروں کے مسائل اور چیلنجز سے وزیرِ تعلیم کو آگاہ کیا اور ان کے حل کے لیے مؤثر اقدامات کی ضرورت پر زور دیا۔
اس موقع پر سلیم بسرا نے بھی نجی شعبہ تعلیم کے کردار اور درپیش مسائل پر اپنے خیالات کا اظہار کیا۔ صوبائی وزیرِ تعلیم رانا سکندر حیات نے وفد کی گفتگو کو غور سے سنا اور یقین دہانی کرائی کہ نجی تعلیمی اداروں کے جائز مسائل کے حل اور تعلیمی نظام کی بہتری کے لیے عملی اور مؤثر اقدامات کیے جائیں گے۔
ملاقات خوشگوار ماحول میں منعقد ہوئی، جس میں تعلیم کے فروغ، نجی تعلیمی اداروں کے استحکام اور باہمی تعاون کو مزید مضبوط بنانے پر اتفاق کیا گیا۔ شرکاء نے اس عزم کا اظہار کیا کہ معیاری تعلیم کے فروغ اور تعلیمی شعبے کی ترقی کے لیے مشترکہ کاوشیں جاری رکھی جائیں گی۔
