گوجرہ : اغوا ہونے والے کمسن بچے ارحم زاہد کی لاش کی باقیات برآمد ہونے کے بعد علاقے میں افسوس اور تشویش کی فضا پھیل گئی۔ پولیس کے مطابق بچے کی باقیات تھانہ نواں لاہور کے علاقے 279 ج ب بجواڑہ قبرستان سے برآمد کی گئی ہیں۔
پولیس حکام کا کہنا ہے کہ ارحم زاہد کو 28 اپریل کو نامعلوم افراد نے مبینہ طور پر اغوا کیا تھا، جس کا مقدمہ تھانہ نواں لاہور میں درج کیا گیا تھا۔ واقعے کے بعد پولیس مختلف پہلوؤں سے تحقیقات کر رہی تھی۔
اطلاع ملنے پر پولیس اور فرانزک ٹیمیں فوری طور پر موقع پر پہنچ گئیں اور جائے وقوعہ سے اہم شواہد اکٹھے کر لیے گئے۔ بعد ازاں بچے کی باقیات کو قانونی کارروائی اور پوسٹ مارٹم کے لیے اسپتال منتقل کر دیا گیا۔
ڈی پی او ٹوبہ ٹیک سنگھ اخلاق اللہ تارڑ کی جائے وقوعہ پر آمد، شواہد اکٹھے کیے جا رہے ہیں
پولیس اور فرانزک ٹیموں کی موقع پر کارروائی، مختلف پہلوؤں سے تفتیش جاری
ڈی پی او اخلاق اللہ تارڑ کا واقعہ کا فوری نوٹس، ملزمان کی گرفتاری کے لیے خصوصی ٹیم تشکیل
اس موقع پر اخلاق اللہ تارڑ بھی جائے وقوعہ پر پہنچے اور تفتیشی عمل کا جائزہ لیا۔ پولیس کا کہنا ہے کہ واقعے کے مختلف پہلوؤں پر تحقیقات جاری ہیں اور ذمہ داران کو قانون کے کٹہرے میں لانے کے لیے کارروائی کی جا رہی ہے۔
ارحم زاہد کی المناک موت کی خبر نے اہلِ خانہ اور علاقے کے مکینوں کو غمزدہ کر دیا ہے، جبکہ شہریوں نے واقعے میں ملوث عناصر کی فوری گرفتاری اور سخت قانونی کارروائی کا مطالبہ کیا ہے۔
