گوجرہ : اسسٹنٹ کمشنر محمد ریاض گجر نے شہر کے مختلف محلوں کا دورہ کیا، جہاں انہوں نے صفائی کی صورتحال، تجاوزات اور دیگر شہری مسائل کا تفصیلی جائزہ لیا۔ اس موقع پر انہوں نے شہریوں کو ہدایت کی کہ وہ محلوں سے جانوروں کو ہٹائیں تاکہ صفائی کے نظام کو بہتر بنایا جا سکے اور ماحولیاتی آلودگی میں کمی لائی جا سکے۔
دورے کے دوران اسسٹنٹ کمشنر نے متعلقہ محکموں کو ہدایات جاری کیں کہ تجاوزات کے خاتمے اور صفائی کے مؤثر انتظامات کو یقینی بنایا جائے، تاکہ شہریوں کو صاف ستھرا اور صحت مند ماحول فراہم کیا جا سکے۔
بعد ازاں انہوں نے جناح پارک گوجرہ کا بھی دورہ کیا، جہاں پارک کی صفائی، دستیاب سہولیات اور مجموعی انتظامات کا جائزہ لیا گیا۔ اس موقع پر انہوں نے عملے کو ہدایت دی کہ پارک میں صفائی کے نظام کو مزید بہتر بنایا جائے اور شہریوں کے لیے تمام سہولیات کی فراہمی یقینی بنائی جائے۔
اسسٹنٹ کمشنر محمد ریاض گجر نے اس عزم کا اظہار کیا کہ عوامی تفریحی مقامات کی بہتری اور خوبصورتی کے لیے ہر ممکن اقدامات کیے جائیں گے تاکہ شہریوں کو ایک بہتر، صاف اور خوشگوار ماحول میسر آ سکے۔
