گوجرہ: بار ایسوسی ایشن گوجرہ نے عوامی مفاد کے پیش نظر وزیر اعلیٰ پنجاب سے مطالبہ کیا ہے کہ الیکٹرک بس سروس کے موجودہ روٹ کو بڑھا کر گورنمنٹ آئی کم جنرل (ECG) ہسپتال تک توسیع دی جائے تاکہ شہریوں کو بہتر سفری سہولیات فراہم کی جا سکیں۔
اس سلسلے میں صدر بار ایسوسی ایشن چوہدری محمد اعجاز اختر کہوجہ اور جنرل سیکرٹری چوہدری ایاز افضل بسرا کی جانب سے ڈپٹی کمشنر ٹوبہ ٹیک سنگھ کو باقاعدہ درخواست ارسال کی گئی ہے۔ ذرائع کے مطابق درخواست کو اسسٹنٹ کمشنر گوجرہ نے ضروری کارروائی کے لیے متعلقہ حکام کو بھجوا دیا ہے۔
بار ایسوسی ایشن کے مطابق الیکٹرک بس سروس کا موجودہ آخری اسٹاپ گورنمنٹ گریجویٹ کالج برائے خواتین گوجرہ ہے، جبکہ ECG ہسپتال وہاں سے تقریباً دو کلومیٹر کے فاصلے پر واقع ہے۔ ہسپتال تک براہِ راست بس سروس نہ ہونے کے باعث بزرگ افراد، مستحق مریضوں اور دیہی علاقوں سے آنے والے شہریوں کو نجی ٹرانسپورٹ کے مہنگے کرائے ادا کرنا پڑتے ہیں، جس سے انہیں مالی اور سفری مشکلات کا سامنا ہے۔
بار ایسوسی ایشن کا مؤقف ہے کہ اگر بس روٹ کو ہسپتال تک توسیع دے دی جائے تو نہ صرف مریضوں کو سہولت میسر آئے گی بلکہ ویمن کالج کے سامنے بسوں اور مسافروں کے رش میں بھی کمی ہوگی، جس سے طالبات کے لیے ماحول مزید محفوظ اور سازگار بنے گا۔
