ٹوبہ ٹیک سنگھ: رمضان المبارک کے دوران حکومتی ایس او پیز کی خلاف ورزی پر انتظامیہ نے سخت کارروائی کرتے ہوئے ایک ہوٹل کو سیل کر دیا۔ اسسٹنٹ کمشنرر منور حسین کملانہ سیال نے اچانک معائنہ کیا جس کے دوران ہوٹل انتظامیہ کو رمضان ضوابط کی خلاف ورزی کا مرتکب پایا گیا۔
ضلعی انتظامیہ کے مطابق معائنے کے دوران ہوٹل میں حکومتی احکامات پر عملدرآمد نہیں کیا جا رہا تھا، جس پر فوری ایکشن لیتے ہوئے ہوٹل کو سیل کرنے کا حکم جاری کیا گیا۔ کارروائی کا مقصد رمضان المبارک کے تقدس کو برقرار رکھنا اور سرکاری ہدایات پر عمل یقینی بنانا ہے۔
اس موقع پر اسسٹنٹ کمشنر منور حسین کملانہ سیال کا کہنا تھا کہ رمضان المبارک کے احترام کو مدنظر رکھتے ہوئے تمام کاروباری مراکز حکومتی ایس او پیز پر سختی سے عمل کریں۔ انہوں نے خبردار کیا کہ خلاف ورزی کرنے والوں کے خلاف بلاامتیاز کارروائی جاری رکھی جائے گی۔
انتظامیہ نے شہریوں سے بھی اپیل کی ہے کہ وہ رمضان ضوابط کی پاسداری کریں اور قانون کی عملداری میں انتظامیہ سے تعاون کریں۔
