گوجرہ ، وزیراعلیٰ پنجاب مریم نواز شریف کے وژن کے مطابق تحصیل گوجرہ میں میونسپل سروسز کی بحالی کا باقاعدہ آغاز کر دیا گیا ہے۔ ڈپٹی کمشنر ٹوبہ ٹیک سنگھ عمر عباس میلہ کی زیر نگرانی گوجرہ میں گرینڈ صفائی اور بیوٹیفیکیشن آپریشن جاری ہے، جس کا مقصد شہریوں کو صاف ستھرا، صحت مند اور خوشگوار ماحول فراہم کرنا ہے۔
صفائی آپریشن کے تحت شہر کی مرکزی شاہراہوں اور اہم راستوں کی واشنگ کا عمل جاری ہے، جس سے شہر کی مجموعی خوبصورتی میں اضافہ ہو رہا ہے اور شہریوں کو بہتر سہولیات میسر آ رہی ہیں۔
اس گرینڈ آپریشن میں تمام متعلقہ ضلعی محکموں کی مشینری اور ہیومن ریسورس کو بروئے کار لایا جا رہا ہے تاکہ صفائی کے عمل کو مؤثر اور پائیدار بنایا جا سکے۔ انتظامیہ کے مطابق یہ اقدامات شہر کی بہتری اور عوامی فلاح کے لیے مسلسل جاری رہیں گے۔
