گوجرہ سے رکن قومی اسمبلی اسامہ حمزہ نے آج قومی اسمبلی کے اجلاس کے دوران شوگر مافیا کے خلاف شدید تنقید کرتے ہوئے کسانوں کے ساتھ ہونے والی مبینہ زیادتیوں کو ایوان میں بے نقاب کیا۔ انہوں نے کہا کہ وزیرِ صنعت شوگر کسانوں کے ساتھ ہونے والی زیادتیوں کے حوالے سے مکمل اور درست حقائق ایوان کے سامنے نہیں لا رہے۔
اسامہ حمزہ کا کہنا تھا کہ ملک میں موجود شوگر ملیں حکمرانوں اور بااثر سیاستدانوں کی ملکیت ہیں، جو گنے کے کاشتکاروں کا استحصال کر رہی ہیں اور کسانوں کو لوٹا جا رہا ہے۔ انہوں نے کہا کہ پہلے گندم کے کاشتکار متاثر ہوئے اور اب شوگر کین کے کسانوں کی حالت بدتر ہو چکی ہے۔
انہوں نے مزید کہا کہ اوکاڑہ، گوجرہ اور ساہیوال سمیت مختلف زرعی علاقوں میں آلو کی قیمتیں اس قدر گر چکی ہیں کہ کسان اپنی فصل جانوروں کو کھلانے پر مجبور ہو گئے ہیں۔ ان کا کہنا تھا کہ یہ تمام شوگر ملیں انہی حکمران سیاستدانوں کی ہیں، جس کا خمیازہ غریب کسان بھگت رہا ہے۔
رکن قومی اسمبلی نے حکومت سے مطالبہ کیا کہ کسانوں کے مسائل کا فوری نوٹس لیا جائے اور شوگر مافیا کے خلاف سخت کارروائی عمل میں لائی جائے تاکہ کسانوں کو ان کا حق مل سکے۔
