گوجرہ : ڈپٹی کمشنر عمر میلہ کی زیر نگرانی جناح پارک سمیت ضلع بھر کے پارکوں میں عوامی سہولیات کو مزید بہتر بنانے کے لیے عملی اقدامات کیے جا رہے ہیں۔ ان اقدامات کا مقصد شہریوں کو ایک محفوظ، تعلیمی اور ثقافتی ماحول فراہم کرنا ہے۔
اس سلسلے میں جناح پارک گوجرہ میں اوپن ڈور لائبریری قائم کی جا رہی ہے تاکہ مطالعے کے فروغ کو یقینی بنایا جا سکے۔ بچوں کے لیے محفوظ اور معیاری پلے ایریا تیار کیا جا رہا ہے، جس سے کم عمر بچوں کو صحت مند تفریحی سہولیات میسر آئیں گی۔
پارک میں آنے والے شہریوں کی رہنمائی کے لیے نئے سائن بورڈز نصب کیے جا رہے ہیں، جبکہ مقامی ثقافت کے فروغ کے لیے پنجابی زبان میں سائن بورڈز بھی آویزاں کیے جا رہے ہیں، جو علاقائی زبان اور ثقافتی شناخت کو اجاگر کرنے کی ایک اہم کوشش ہے۔
ضلعی انتظامیہ کا کہنا ہے کہ عوامی سہولیات کی بہتری اور مقامی ثقافت کے فروغ کے لیے ایسے اقدامات آئندہ بھی جاری رکھے جائیں گے۔ شہریوں نے ضلعی انتظامیہ کے ان اقدامات کو خوش آئند قرار دیا ہے۔
