گوجرہ : جماعت اسلامی پاکستان کے امیر حافظ نعیم الرحمن نے گوجرہ میں منعقدہ تین روزہ "کسان بچاؤ، پاکستان بچاؤ" روڈ کارواں کے اختتامی جلسہ عام سے خطاب کرتے ہوئے کہا کہ ملک کی معیشت کی بنیاد کسان ہے، مگر بدقسمتی سے حکمران طبقہ کسان دشمن پالیسیاں اپنا کر زراعت کو تباہ کر رہا ہے۔
جلسے میں مختلف علاقوں سے آنے والے کسانوں، کارکنانِ جماعت اسلامی اور شہریوں کی بڑی تعداد نے شرکت کی۔ عوام نے نعروں اور جوش و خروش کے ساتھ حافظ نعیم الرحمن کا پرتپاک استقبال کیا۔
اپنے خطاب میں حافظ نعیم الرحمن نے کہا کہ کسانوں کو ان کی محنت کا صحیح معاوضہ نہیں مل رہا، زرعی مداخل کی قیمتیں آسمان سے باتیں کر رہی ہیں جبکہ حکومت نے کسانوں کو مسائل کے بھنور میں دھکیل دیا ہے۔ انہوں نے مطالبہ کیا کہ کھاد، ڈیزل، بجلی اور زرعی ادویات کی قیمتوں میں فوری کمی کی جائے اور گندم، چاول، کپاس اور گنے کے لیے منصفانہ نرخ مقرر کیے جائیں۔
امیر جماعت اسلامی نے کہا کہ "کسان بچاؤ، پاکستان بچاؤ" مہم کا مقصد ملک کے اصل محسنوں کو ان کا حق دلوانا ہے۔ انہوں نے کہا کہ جماعت اسلامی اقتدار میں آ کر کسان دوست پالیسی اختیار کرے گی تاکہ زراعت مضبوط ہو اور دیہی معیشت کو سہارا ملے۔
جلسہ سے جماعت اسلامی کے مقامی رہنماؤں نے بھی خطاب کیا اور حافظ نعیم الرحمن کی قیادت میں ملک گیر عوامی جدوجہد کو خوش آئند قرار دیا۔
