گوجرہ: معروف قانون دان اور سابق صدر انصاف لائرز فورم پی ٹی آئی، سجاد اصغر کھوکھر ایڈووکیٹ نے بار کونسل کے آئندہ انتخابات سے دستبردار ہونے کا اعلان کر دیا ہے۔ یہ فیصلہ انہوں نے پاکستان تحریک انصاف کے سینئر رہنماؤں اور قریبی مشیروں سے مشاورت کے بعد کیا۔
ذرائع کے مطابق سجاد اصغر کھوکھر ایڈووکیٹ کو پارٹی سطح پر بعض تنظیمی امور اور سیاسی حکمت عملی کے تحت انتخابی عمل سے علیحدہ رہنے کا مشورہ دیا گیا، جس پر انہوں نے پارٹی ڈسپلن کو ترجیح دیتے ہوئے الیکشن سے کنارہ کشی اختیار کی۔
ان کے اس فیصلے کو قانونی برادری میں قدر کی نگاہ سے دیکھا جا رہا ہے، جبکہ انصاف لائرز فورم کے کارکنان اور حلقہ احباب نے اس فیصلے کو ایک ذمہ دارانہ سیاسی قدم قرار دیا ہے۔
یاد رہے کہ سجاد اصغر کھوکھر ایڈووکیٹ نہ صرف گوجرہ کی وکلا برادری میں نمایاں مقام رکھتے ہیں بلکہ پی ٹی آئی کے فعال اور نظریاتی کارکن بھی سمجھے جاتے ہیں۔
