گوجرہ : پنجاب حکومت کی جانب سے وزیراعلیٰ لائیوسٹاک کارڈ ہولڈرز کے لیے ایک اہم ہدایت جاری کی گئی ہے، جس میں تمام مستفید افراد کو ہدایت دی گئی ہے کہ وہ کارڈ کے ذریعے حاصل کردہ رقم کی بروقت واپسی یقینی بنائیں۔
حکام کے مطابق وہ افراد جنہوں نے تاحال واجب الادا رقم جمع نہیں کروائی، انہیں ہدایت کی گئی ہے کہ 15 اپریل سے قبل اپنی تمام بقایاجات ادا کر دیں۔ مقررہ تاریخ کے بعد ادائیگی نہ کرنے والے افراد کو مختلف مسائل کا سامنا کرنا پڑ سکتا ہے۔
اعلامیے میں واضح کیا گیا ہے کہ بروقت ادائیگی نہ کرنے کی صورت میں متعلقہ افراد کو پروگرام کے اگلے مرحلے میں شامل ہونے سے محروم کیا جا سکتا ہے، جس کے باعث وہ آئندہ دی جانے والی سہولیات سے فائدہ نہیں اٹھا سکیں گے۔
حکام نے لائیوسٹاک کارڈ ہولڈرز پر زور دیا ہے کہ وہ ذمہ داری کا مظاہرہ کرتے ہوئے بروقت ادائیگی کریں تاکہ حکومتی سہولیات کا تسلسل برقرار رکھا جا سکے۔
مزید معلومات اور رہنمائی کے لیے متعلقہ لائیوسٹاک دفاتر سے رابطہ کرنے کی ہدایت بھی جاری کی گئی ہے
